MİRZƏYEV AKİF BALAY OĞLU

Mirzəyev Akif Balay oğlu, 1957-ci ildə Kəlbəcər rayonunun İstibulaq kəndində anadan olmuşdur. O, 1964-cü ildə Çaykənd kənd orta məktəbinə daxil olmuş, 1974-cü ildə həmin məktəbi əla qiymətlərlə bitirmişdir.

A.B.Mirzəyev 1974-cü ildə Azərbaycan Dövlət Universitetinin geologiya-coğrafiya fakültəsinə daxil olmuş və həmin fakültəni 1979-cu ildə fərqlənmə diplomu ilə qurtarmışdır. O, təyinatla Mingeçevir şəhərinə göndərilmiş və oradakı 7 №-li şəhər orta məktəbində müəllim, həm də Şəhər Təhsil Şöbəsində inspektor vəsifəsində işləmişdir.

1983-cü ildə Azərbaycan Elmlər Akademiyası Coğrafiya İnstitutunun “Təbiəti mühafizə və ehtiyyatlardan səmərəli istifadə” şöbəsində əyani aspiranturaya daxil olan Akif Mirzəyev, 1986-cı ildə aspiranturanı müvəffəqiyyətlə qurtarmışdır.

A.B.Mirzəyev 1987-ci ildə Azərbaycan Elmlər Akademiyasının akademiki, Coğrafiya İnstitutunun direktoru Həsən Əliyevin və Azərbaycan Respublikası Kənd Təsərrüfatı Nazirliyinin Ekoloji Mərkəzinin direktoru, professor Fəzli Hacıyevin rəhbərliyi altında “Azərbaycan SSR-də iri energetik stansiyaların ətraf mühitə təsirinin qiymətləndirilməsi” mövzusunda dissertasiya müdafiə edib, coğrafiya elmləri namizədi alimlik dərəcəsinə layiq görülmüşdür. Müdafiə Türkmənistan Elmlər Akademiyasının Səhra İnstitutunda keçirilmişdir.

A.B.Mirzəyev Azərbaycan Respublikasında ilk dəfə olaraq coğrafiya elmi sahəsində təbiəti mühafizə üzrə müdafiə edən ilk mütəxəssis olmuşdur. Həmin sətirlər yazılan vaxta qədər, Mirzəyev Akifin 40-dan çox elmi əsər və məqalələri çap olunmuşdur. O, dəfələrlə Moskva, Lelinqrad, Kiyev, Daşkənd, Aşqabad və s. şəhərlərdə keçirilmiş elmi müşavirə və simpoziyumlarda məruzə ilə çıxış etmişdir. O, Azərbaycan Respublikası təbiətin mühafizəsi cəmiyyətinin fəal üzvlərində biri kimi fəaliyyət göstərir.

A.B.Mirzəyev Azərbaycan EA Coğrafiya İnstitutunda təbiəti mühafizə şöbəsinin böyük elmi işçisidir.

O, evlidir, üç övladı var.