Aqil Məmmədov
Milli Məclisin deputatı
Azərbaycan Respublikasının Prezidenti İlham Əliyev haqqında düşünərkən ilk yada düşən Ulu Öndərin 2003-cü il prezident seçkiləri zamanı xalqa müraciəti olur.
Ulu Öndər xalqa müraciətində deyirdi: “Üzümü Sizə - həmvətənlərimə tutaraq, qarşıdan gələn Prezident seçkilərində Prezidentliyə namizəd, mənim siyasi varisim, Yeni Azərbaycan Partiyası sədrinin birinci müavini İlham Əliyevi dəstəkləməyə çağırıram. O, yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir. Sizi əmin edirəm ki, həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək Azərbaycan dövlətinin inkişafı və xalqımızın firavanlığı yolunda çox işlər görəcəklər. İnanıram ki, mənim axıra çatdıra bilmədiyim taleyüklü məsələləri, planları, işləri Sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm”.
Bəlkə də, o zaman belə uzaqgörənliklə, müdrikliklə edilmiş bu müraciət bəzilərinin dar düşüncə pəncərəsindən süzülərək yanlış yozumlara mövzu olmuşdu. Lakin, 19 il göstərdi ki, Ümummili Lider Heydər Əliyev İlham Əliyevi Azərbaycanın rəhbəri kimi görərək xalqa müraciət edərkən, 19 ildən sonrakı Azərbaycanı təsəvvür edirdi, görürdü. Bu baxımdan, mübaliğəsiz demək olar ki, Ulu Öndərin bu seçimi yanız və yalnız Azərbaycan dövlətinin, Azərbaycan xalqının maraqlarına hesablanmışdı.
Prezident İlham Əliyevin yürütdüyü siyasət Azərbaycanın güclənməsinə, xidmət etmiş oldu.
İlham Əliyevin Prezidentliyi ilə paralel olaraq onunYeni Azərbaycan Partiyasına rəhbərliyi də eyni vaxta təsadüf edir. İlham Əliyevin sədrliyi dövründə partiyamız daha da güclənmiş, yenilənmiş və bu gün ölkənin bir nömrəli siyasi təşkilatı olaraq öz liderliyini qoruyub saxlamaqdadır.
Bu gün Prezident İlham Əliyev yalnız Yeni Azərbaycan Partiyasının deyil, siyasi mövqeyindən, hakimiyyətdə təmsil olunub-olunmamasından asılı olmayaraq demək olar ki, siyasi spektrin böyük hissəsinin qəbul etdiyi siyasi liderdir. Son üç il ərzində siyasi partiyalar tərəfindən imzalanmış birgə bəyanatlarda milli maraqlar naminə həmrəylik, ölkəmizdə mövcud siyasi potensialın yalnız dövlətin inkişafına və milli maraqlara xidmət etdiyini göstərir.Cənab Prezident bu haqda söyləyir:“Ümummilli məsələlərdə heç bir fərqli fikir ola bilməz. Ümumi məsələlər Qarabağ məsələsidir. Ümumi məsələlər siyasi partiyaların fəaliyyətidir, demokratiyanın inkişafıdır, iqtisadi azadlıqların bərqərar olmasıdır, ölkəmizin güclənməsidir. Bu gün bu siyasi dialoq aparılır. Mən bunu çox təqdir edirəm. Hesab edirəm ki, ölkəmizin gələcək siyasi sisteminin təkmilləşməsi üçün bunun böyük əhəmiyyəti var. Prezident İlham Əliyevin “Biz birlikdə güclüyük” şüarı siyasi spektrin milli məsələlərdə ortaq mövqe nümayiş etdirmək mövqeyinin əsasını təşkil edir.
Bu gün Azərbaycan liderinin qlobal təşəbbüsləri dünyada böyük rəğbət və dəstəklə qarşılanır. Qoşulmama Hərəkatının sədri qismində Prezident İlham Əliyevin təşəbbüsü ilə 2020-ci ilin dekabrında BMT Baş Assambleyasının COVID-19 pandemiyası ilə mübarizəyə həsr edilmiş Xüsusi Sessiyası keçirilmişdir. 18 noyabr 2021-ci il tarixində BMT Baş Assambleyasının 76-cı sessiyası çərçivəsində Qoşulmama Hərəkatının sədri qismində Azərbaycan Respublikası Prezidentinin təşəbbüsü ilə QH üzvləri adından irəli sürülmüş “COVID-19 əleyhinə peyvəndlərə bərabər, məqbul qiymətə, vaxtında və universal əlçatanlığın təmin edilməsi” adlı qətnamə BMT üzv dövlətləri tərəfindən qəbul edilib. Qətnaməyə 126 BMT üzv dövləti həm-müəllif qismində qoşulub. Azərbaycanda davamlı olaraq Bakı Beynəlxalq Humanitar Forumu, Ümumdünya Mədəniyyətlərarası Dialoq Forumu, habelə BMT Sivilizasiyalar Alyansının VII Qlobal Forumu, UNESCO-nun xüsusi sessiyalarının və onlarla digər əhəmiyyətli tədbirlərin keçirilməsi nəticəsində Bakı qlobal münasibətlər sistemində nüfuzlu beynəlxalq siyasi meydanlardan birinə çevrilib.
Beynəlxalq əməkdaşlıq müstəvisində Azərbaycan-Türkiyə münasibətləri dünyada analoqu olmayan mahiyyət kəsb edir. İki qardaş ölkə arasında münasibətlərin bu səviyyəyə çatmasının müasir memarları sözsüz ki, Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğandır. 2021-ci il iyunun 15-də Şuşada imzalanmış Bəyannamə iki ölkə və onun xalqları arasındakı dostluq və qardaşlıqdan çıxış edərək Azərbaycan Respublikası və Türkiyə Respublikası arasındakı münasibətləri keyfiyyətcə yeni, müttəfiqlik səviyyəsinə qaldırmışdır. Bəyannaməyə əsasən tərəflər xarici siyasət sahəsində əlaqələndirməni və müntəzəm ikitərəfli siyasi məsləhətləşmələri həyata keçirir.
İki ölkə arasında dərinlşən müttəfiqlik istər0istəməz digər türk respublikalarına da, müsbət təsir göstərir. Onların inteqrasiyaya fəal şəkildə qoşulmasını təşviq edir. Bu baxımdan Azərbaycanın Türk Dövlətləri Təşkilatı və digər ortaq qurumlarda aktiv rolu bilavasitə Prezident İlham Əliyevin adı ilə bağlıdır.
Prezident İlham Əliyevin rəhbərliyi ilə görülmüş genişmiqyaslı işlər, sistemli və ardıcıl tədbirlər, dərin islahatlar nəticəsində hazırda Azərbaycan siyasi və makroiqtisadi baxımdan sabit, təhlükəsiz ölkə, regionun siyasi, iqtisadi və mədəni mərkəzi, irimiqyaslı enerji, nəqliyyat və infrastruktur layihələrinin təşəbbüskarı və fəal iştirakçısı, Avropanın enerji təhlükəsizliyinin təmin edilməsində etibarlı tərəfdaş, dünya kosmos ailəsinin üzvü, mühüm tranzit qovşağıdır.
Ötən dövrdə Silahlı Qüvvələrin maddi-texniki təchizatının yenilənməsi, müasir infrastrukturun yaradılması, hərbi qulluqçuların sosial müdafiəsi, mənzil təminatının yaxşılaşdırılması, həmçinin müdafiə sənayesinin inkişaf etdirilməsinə Prezident İlham Əliyev tərəfindən xüsusi diqqət ayrılıb. Azərbaycan Silahlı Qüvvələri Müzəffər Ali Baş Komandan İlham Əliyevin rəhbərliyi altında 44 gün davam edən Vətən müharibəsində düşmən üzərində qələbə çalaraq tarixi nailiyyətə imza atdı. Müharibənin nəticəsində 300-dən çox şəhər və kənd döyüş meydanında işğaldan azad edildi. Düşmən ağ bayraq qaldırdı, təslim oldu və məcbur oldu ki, noyabrın 9-dan 10-na keçən gecə kapitulyasiya aktına imza atsın. Bunun nəticəsində yüzlərlə şəhər və kənd bir güllə atmadan, bir şəhid vermədən geri qaytarıldı. 44 günlük Vətən müharibəsi Ali Baş Komandan İlham Əliyevin qətiyyəti, xalqın birliyi və Ordumuzun gücü nəticəsində Zəfərlə sona çatdı.
Müharibədən sonra Orduya ayrılan xərclər azalmayıb, əksinə, artırılıb. Müharibədən sonra imzalanmış yeni kontraktlar icra edilir. Yeni kontraktlar əsasında artıq Azərbaycana Ordumuzun təchizatı üçün ən müasir silahlar, texnikalar gətirilir. Böyük Qələbənin nəticəsində yaradılmış yeni reallıq Qarabağın bərpası və inkişafını nəzərdə tutan Böyük Qayıdış strategiyasının aktuallığını təmin edir. Sözügedən strategiya yeni infrastrukturun yaradılması ilə yanaşı, işğaldan azad olunmuş ərazilərin ümumən regionun yeni inkişaf modelinə çevirməkdən ibarətdir. Belə ki, layihələndirmə işlərində tətbiq olunan yeniliklərin bir çox dövlətlər üçün nümunəvi model kimi qəbul olunması və məsələ ilə bağlı səslənən beynəlxalq etiraflar Qayıdış strategiyasının effektivliyi və perspektivliyi haqqında xəbər verir.
Bu gün yeni doğum gününü qarşılayan Prezident İlham Əliyev hələ bundan sonra uzun illər Azərbaycan dövləti və xalqına Müzəffər Ali Baş Komandan kimi liderlik edəcək. Azərbaycan xalqı da öz liderinin ətrafında sıx birlləşərək böyük və bütöv Azərbaycanı quracaqdır!
